LEGAZPI CITY-Piglalaoman kan Philippine National Police (PNP) sa mga opisyal kan barangay asin publiko na magtarabangan ngani mamantenir an matoninong asin magin maayos an pagselebrar kan pagsabat sa bagong taon.
Pigpapagirumduman ni Philippine National Police acting chief Police Lieutenant General Jose Melencio Nartatez Jr. an publiko na manteniron an ligtas an pagselebrar kan bagong taon, huli sa dai mababa sa 100 na indibidwal na an nagin biktima kan paputok.
Katakod kaini, nangangapudan an hepe kan pulisya sa namamanwaan na ibitaran an paggamit kan paputok para sa saindang kaligtasan,
Pigenganyar man kaini an mga lider kan barangay na magin aktibo asin siertuhon an seguridad kan mga namamanwaan sa saindang lugar orog na an pagbabawal kan paggamit kan mga iligal na paputok sa pagselebrar kan bagong taon.
Mientrastanto, sa huring datos na ipinaluwas kan Department of Health (DOH) nagrapado na sa 91 an kaso kan mga indibidwal na nairido huli sa paputok, mas hababa ini sa 34% kumpara sa nairehistro kan ahensya kan nakalihis na taon kun sain nagabot sa 137 an kaso kan mga biktima nin paputok.
Mantang ipinagbabawal man an paggamit kan mga paputok siring kan watusi, lolo thunder, pop pop, atomic triangle, pla-pla, mother rockets, piccolo, asin goodbye Philippines.”
