LEGAZPI CITY-Sarong dakulang selebrasyon nin Kapaskuhan an isinagibo sa Betlehem, lugar kun sain namundag si Jesu-Cristo, na sa kaenot-enoting pagkakataon ipigselebrar poon kan magsiklab an gera sa pagultanan kan Israel asin kan Hamas.
Mantang inaantisipar kan ciudad an selebrasyon nin Pasko taon-taon alagad dae na ini pigselebrar kan mga nakaaging taon huli sa gera.
Dati nang nagdesisyon an ciudad na kanselahon an magarbong selebrasyon nin Pasko kan mga nakaaging taon huli sa pakikisumaro asin konsiderasyon sa kamugtakan kan mga sibilyan na nakaistar sa Gaza, na mismong sentro kan kariribukan.
Mantang an Bethlehem igwang harayong distansya sa Gaza, apektado ini kan nagpapadagos na iriwal, huli sa an nasabing ciudad an nakadepende sa turismo, asin saro sa mga sektoe na pangenot na nadanyaran sa gera.
Ngunyan na taon, nagbalik liwat an mga magagarbong parada sa lugar, asin masiglang partisipasyon kan mga residente, pati na an mga turistang mawot magpasiring sa ciudad.
Sa Manger Square, an lugar sa Betlehem kun sain namundag si Jesu-Cristo, dakol na mga pilgrim liwat an pinayagan na makisumaro sa parada asin iba pang mga aktibidad na normal na binuksan sa mga turista.
Mahihiling man an mga dekorasyon sa Pasko sa haros gabos na parte kan Betlehem.
Magigirumduman na enot na nagpoon an gera sa pagultanan kan Hamas asin Israel kan Oktobre 2023 kun sain rinibong katawo an nagadan, nawawara asin nairido.
