LEGAZPI CITY-Sinangatan nin anonymous graft complaint sa Office of the Ombudsman si Health Secretary Ted Herbosa asin duwang opisyal kan Department of Health katakod kan suboot paggamit kan P98 milyong pondo kan gobierno para sa sarong radio program na pigsasabing nagserbing plataporma para sa personal publicity.
An nagrereklamo, na nagpabistong Alliance for Clean and Transparent Government (ACTGov) an nagsangat mismo kan reklamo laban ki Herbosa, Assistant Secretary Albert Domingo, asin Director Tina Marasigan.
Segun sa nagreklamo, ginamit suboot kan mga opisyal an radio program para sa pansadiring pakinabang, imbes na para sa health promotion sana.
Kaiba sa reklamo an alegasyon kan conflict of interest, huli sa agom ni Director Marasigan an ehekutibo kan kumpanyang nagtataong content sa radio station.
Susog sa nagreklamo, pagbayolar suboot ini sa ley sa paagi kan sabay na obligasyon bilang pampublikong opisyal mantang nagtutukaw na anchor o host kan radyo na pinondohan kan kaban kan bayan.
Nilinaw man ni Assistant Secretary Domingo na wara pa sindang nareresibe na kopya kan reklamo asin sinabing an anchoring asin hosting kasunod kan patarakan kan gobierno.
Pinahimutikan man niya an reklamo asin inapod na warang basehan.
Sa hiwalay na pahayag, sinabi ni Secretary Herbosa na legal asin transparent an paggamit kan media platforms kan DOH asin nagsusunod sa ley asin media ethics.
Dagdag pa niya na obheto kan programa an makapaghatod nin tamang impormasyon sa salud kan publiko.
