LEGAZPI CITY-Mahigot an pagirumdom kan Albay Provincial Health Office (APHO), katakod kan peligro kan pigaapod na “Holiday Heart Syndrome” ngonian na paparani na an kapaskuhan.
Segun kay Albay Provincial Health Office Head Dra. Estela Zenit sa intrevista kan Bombo Radyo Legazpi, saro ini sa mga dapat ibitaran enkaso sobra sa pagkakan, sobrang pag-inom nin arak, asin aktibidad.
Paglinaw kan opisyal na an “Holiday Heart Syndrome” an simple heart attack na nagkakawsa nin stress sa hawak kan sarong tawo orog na sa mga may dating ng helang.
Dapat suboot na mag-inom kan saindang maintenance asin ibitaran an pagkaon nin “4M’s” o an Mahahamis, Maaskad, Matataba, asin Mamantika huli sa pwedisir ining magresulta sa paghalangkaw kan blood pressure, pagkakaigwa nin diabetes asin heart attack.
Dugang pa kan opisyal na enot an heart syndrome, hypertension, asin heart complaints sa mga admission tuyong holiday season.
An mga sintomas kaini, iyo an pangungulog kan payo asin batok, chest pain, pamamanhid kan mga kamot, sobrang kapagalan, asin pagkalibong na enkaso mamatean, an dapat tulos na magkonsulta sa Doktor.
Sa ngonian wara pa nin nairehistrong kaso kaini sa rehiyon.
Pagirumdom kan opisyal na importante an bastanteng pahingalo asin turog, pag-diet, pag-ehersisyo, asin pagmantenir kan hygiene.
