LEGAZPI CITY—Tolong indibidwal an kumpirmadong binawian nin buhay makalihis na nagtaob an piglunadang kaining motorbanca sa banwaan kan Aroroy, Masbate.
Segun ki Aroroy Municipal Disaster Risk Reduction Management Office Head Ronnie Atacador, sa intrevista kan Bombo Radyo Legazpi, pasiring an motorbanca sa Peñafrancia-Burias alagad pag-abot sa parte kan Barangay Gumahang kan naunambitang banwaan an bigla na nagkaigwa nin “subasco” o darakulang hukol asin makusog na paros na nagresulta sa pagkakataob kaini.
Nailigtas an nasa 34 pasahero asin basado man sa pinakahuring datos, tolo an kumpirmadong gadan mantang presente pang pighahanap an nawawarang 3-anyos na aki.
Dugang kan opisyal na nagpapadagos man an search and retrieval operation kan saindang opisina asin Philippine Coast Guard.
Mientrastantio, nagpatanid man si Atacador sa mga motorbanca operators na enoton pirme an kaligtasan siring kan pagsulot nin safety gears asin dae na magpirit na maglawod urog na kun delikado an panahon asin alanganin sa oras.
