LEGAZPI CITY – Ikina-ugma kan grupo nin mga paratukdo an pag-apruba kan Productivity Enhancement Incentive kan mga kwalipikadong government employees para sa Fiscal Year 2025.
Segun ki Teachers Dignity Coalition Chairman Benjo Basas sa intrevista kan Bombo Radyo Legazpi na nauugma sinda huli ta haloy man nindang pighalat an pagkakagawad kan naunambitang insentibo.
May ibang rehiyon na suboot an nakaresibi na kan saindang mga insentibo mantang piglalaoman ninda na matatapos an pagbabarewas sagkod matapos an presenteng taon.
Pagdoon niya man na kadaklan sa mga paratukdo an nakaresibi kan saindang mga benipisyo arug kan year-end bonus, cash gift, Performance-Based Bonus, asin iba pa antes matapos anm huring aldaw kan Fiscal Year 2025 sa mga eskwelahan.
Mientrastanto, dae na man ikinakigkig kan opisyal an mapadapit sa sarong datus na nagtataram na 7 sa 10 estudyanteng pilipino an kulang sa basic reading skills.
Pangapodan ninda sa gobierno na seryusuhon an pagtatao nin aksyon sa problemang pigkakahampang kan sektor urog nang padiit-diit nang nauungusan kan ibang nacion arug kan Cambodia asin Myanmar an Pilipinas mapadapit sa basic reading skills.
Paglilinaw man ni Basas na dae man dapat pagbasulon an mga paratukdo sa resulta kan naunambitang pag-aadal huli ta bako man sinda an pangenot na factor kun nyata nagbababa an lebel kan pagbasa kan mga estudyanteng Pilipino.
