LEGAZPI CITY—Narekober kan mga personahes kan Philippine Army asin Philippine National Police an nasa 45 na haralangkaw na kalibre nin badil, siring man an manlain-laing bala asin magasin sa duwang pigtataguan nin mga armas sa Barangay Exciban, Labo, Camarines Norte.
Segun ki 9th Infantry Batallion Philippine Army Division Public Affairs Office Major Frank Roldan, sa intrevista kan Bombo Radyo Legazpi, nadukayan ini sa pinagsarong operasyon kan 42nd Infantry Battalion, 16th Infantry Battalion asin PNP sa naunambitang lugar.
Enot na nakua an nasa 26 na haralangkaw na kalibre nin badil sa sarong taguan kan nasabing lugar, alagad nadugangan ini nin 19 pang haralangkaw na kalibre nin badil kan nakaresibe liwat sinda nin impormasyon gikan sa sarong informant na may panibagong nadukayan na taguan nin mga armas sa karatig na lugar.
Dugang kan opisyal na pagsadiri ini kan Bicol Regional Party Committee (BRPC).
Sa presente, nasa kustodiya na kan saindang opisina an nasabing mga armas para sa proper accounting asin dokumentasyon asin nakatalaang i-turnover sa kapulisan para sa magkakanigong disposisyon.
Mientrastanto, pig-asigurar man ni Roldan an namamanwaan na nagtitinir na nasa offensive mode an mga suldados nganing masierto na dae maggibo nin anumang opensiba an mga natatadang miyembro kan New People’s Army ngonian na holiday season.
