LEGAZPI CITY-Kinumpirma kan Bureau of Immigration na pirang semana nang yaon sa Pilipinas an mag-ama na suspek sa pambabadil sa Bondi Beach sa Sydney, Australia.
Segun kay Bureau of Immigration Spokesperson Dana Sandoval, si Sajid Akram, 50-anyos asin an saiyang 24-anyos na aking lalaki na si Naveed Akram, nagbyahe pasiring sa Pilipinas.
Nagabot an mga ini sa Davao kan Nobyembre 1, 2025 asin nagbalik sa Australia kan Nobyembre 28, 2025.
Nagbuyagyag man sa impormasyon na Indian passports an ginamit kan duwang suspek.
Magigirumduman na an mag-ama an nagsagibo kan pambabadil kan Disyembre 14 na ikinagadan kan 15 katawo asin dakul pa an nairido sa Australia.
Nagadan an ama na suspek mantang nagpaparahay pa sa ospital an saiyang aki makalihis na badilon kan mga otoridad.
Makusog an pagtubod kan mga otoridad na konektado an duwa sa Islamic State terror huli ta may nahiling sindang bandera sa saindang mga lunadan siring man an sarong improvised explosive device.
