LEGAZPI CITY – Puga-puga na an implementasyon kan Oplan Iwas Paputok kan Bureau of Fire Protection Legazpi City ngonian na paparani an kapaskuhan asin bagong taon.
Segun ki BFP Legazpi Public Information Unit Chief Senior Fire Officer II Norman Andes sa intrevista kan Bombo Radyo Legazpi na padagos an paglibot kan saindang mga firetrucks sa mga Barangay nganing ma-impormaran an namamanwaan mapadapit sa huma kan paputok asin kasulo.
Nagkondusir na man sinda nin serye nin inspeksyon sa mga establisyemento nganing aramon kun nagsusunod an mga ini sa fire safety compliance na para man sa saindang ikakarahay asin sa mga konsumidores.
Nakatalaan man nindang i-deploy an saindang mga personahes sa mismong aldaw kan kapaskuhan urog na sa mga mall asin pasyaran na dadagsaon kan publiko.
Pigtaram pa kan opisyal na sa presente an wara pa sindang nanunutarang nagti-tienda nin paputok sa ciudad mantang naghahalat sinda sa idedesignar kan lokal na gobierno na selling area sa mga masunod na aldaw.
Nganing maiselebrar suboot an nin matuninong an pagpapalit kan taon an mas maray na maggamit kan mga paputok na bako ipinagbabawal kan mga otoridad.
Pinag-iingat man ni Andes an publiko sa paggamit nin kuryente ngonian na christmas season nganing malikayan an anumang klase nin kasulo.
