LEGAZPI CITY-Target suboot ni Presidente Ferdinand Bongbong Marcos Jr. na mapuho an kanser kan kurapsyon sa sosyedad.
Aminado si Presidente Marcos Jr. na nagin maribok asin pasakit an pigpapaotob na mga pagbabago kan administrasyon huli ta obheto kaini na mabago an bilog na sistema na haloy nang dominado kan kurapsyon.
Segun sa Chief executive na an paglinig kan ‘kanser’ sa gobierno an garo man sana “major surgery” na kun sain dai malilikayan an pagkawsa nin mga pagtios.
Naghagad man nin dispensa an Presidente sa publiko sa nagin epekto kaini, alagad pigduon na kun dae ini gigibuhon, madagos sana an mga salang gibo kan nakalihis na tulong dekada.
Sinabi pa ni Marcos na aram kan saiyang team an direksyon na saindang piglalakaw asin dae man sinda nagrarayo sa dalan, orog na sa pagpapadagos kan kampanya kontra sa korapsyon asin pang-aabuso.
Mantang difisil suboot an sitwasyon, naglalaom an Presidente na sa maabot an aldaw na masasabi kan mga Pilipino na “worth it” an mga sakripisyo.
Tinawan duon man niya na posibleng maghaloy an proseso, alagad kun padagos suboot na magtatrabaho, magkakaigwa ini nin marhay na resulta.
