LEGAZPI CITY – Libu-libong indibidwal sa lalawigan ng Albay ang nakiisa sa pag-martsa at protesta kasabay ng kaarawan ni Andres Bonifacio upang kondenahin ang malawakang korapsyon sa mga infrastructure projects ng gobyerno.
Ayon kay Albay Movement Against Corruption Spokesperson Tet Riofante sa panayam ng Bombo Radyo Legazpi na tulad ng pakikipaglaban ni Bonifacio para sa kalayaan ng Pilipinas noong panahon ng mga Espanyol ay nais din nilang makibaka upang makamit ang hustisya para sa mga Pilipinong biktima ng korapsyon.
Punto niya na kahit hindi pa lumilitaw ang rehiyon ng Bicol sa isyu ng korapsyon ngayon, dapat tandaan ng publiko na ang umano’y tinuturong utak ng mga ghost flood control project ay isang Bikolano.
Mayroon din silang mga medical team na naka-standby upang agad na tumulong sa mga nangangailangan ng medikal na atensyon lalo na ngayon na nagbabago ang panahon.
Sinabi ng opisyal na ang kanilang kilos protesta ay binubuo ng mga sektor ng mga estudyante, magsasaka, kabataan, transportasyon, mga Barangay Health Worker at iba pa.
Nagnanais din silang hindi na msundan ang trillion peso march na isinasagawa ngayon sa iba’t-ibang panig ng bansa kaya dapat managot na ang mga sangkot sa korapsyon, ibalik ang mga ninakaw na pondo, at dapat ibigay ang hustisya para sa mga Pilipino.
Naniniwala rin si Riofante na dapat makiisa ang lahat sa paghingi ng accountability at transparency habang pinasalamatan niya ang media sa pagbalita sa kasalukuyang isyu na siyang gumising sa diwa ng mga pilipino.
