LEGAZPI CITY—Isinerbi kan mga kapulisan an warrant of arrest kontra sa dating kongresista na si Zaldy Co asin iba pang akusado na nadadawit sa maanomalyang flood control sa Misibis Bay, Cagraray Island sa banwaan kan Bacacay, Albay.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, mandato ini kan kapulisan huli sa nagpaluwas nin warrant of arrest an Sandiganbayan kaya kinakaipuhan na iserbi ini sa mga last known address o sa mga address na saindang piglalaoman na kaipuhan iserbi an warrant of arrest.
Nagin welcome man suboot sinda sa lugar asin digdi na ipigkundusir an pag-check sa mga kwarto magin an ibang area alagad nagin negatibo an paghahanap sa mga nasabing indibdiwal.
Tinawan-doon man kan opisyal na mantang wara sindang naabutan na mga persona sa lugar an importante man giraray na naiserbi an warrant of arrest.
Huli ini sa legal procedure kun sain makalihis an sampulong aldaw an makasimbag sinda sa Return of Warrant na inisyu kan Sandiganbayan.
Mientrastanto, mensahe man kan opisyal sa mga dae pa nagsusurender na sainda ining tatabangan en kaso kinakaipuhan nin police assistance.
Siring man na en kaso may impormasyon an publiko sa mga dae pa nagsusurender na persona an pwedesir ining ipagtaong aram sa saindang ofisina.
