LEGAZPI CITY – Pigkakahandalan kan dating mambabatas na dae matutukar kan Blue Ribbon Committee kan Senado asin House of Representatives an mga alegasyon ni resigned Cong. Zaldy Co laban kay Presidente Ferdinand Marcos Jr.
Segun ki Former ACT Teachers party-list Representative France Castro sa intrevista kan Bombo Radyo Legazpi na ini an nahihiling na rason kun kaya nagsunad an Makabayan Bloc nin resolution sa Independent Commission on Infrastructure (ICI) mapadapit sa pag-imbestiga sa pagkaka-imbwelto kan Presidente sa serye nin katiwalian sa proyekto kan gobierno.
Punto niya na dae makukuwa an pinaka-ugat kan nangyayaring korapsyon kun dae maiimbestigaran an rebelasyon ni Co kun sain pigtutukdo kaini an 11 pang indibidwal kabale sinda dating Executive Sec. Lucas Bersamin, dating Budget Sec. Amenah Pangandaman asin dating House Speaker Martin Romuladez.
Nagtutubod sinda na bako sana mga saradit na empleyado kan Department of Public Works and Highways (DPWH) an dapat mapanimbag kundi pati na man an mga nasambit ni Co an dapat ma-imbestigaran kun mawot kan ICI na maaraman an katotoohan.
Pigtaram pa kan dating opisyal na maski bako under-oat an mga pigbubutasang statement ni Zaldy Co an dapat hilingon man kan Independent Commission an gabos na circumstances urog na kun dae na ini tutukaron pa kan Senate Blue Ribbon Committee.
Wara man suboot sindang pig-aakusaran sa saindang isinumiter na resulusyon kundi mawot sana nindang pa-imbestigaran asin dae makuntento sa mga pagpapaluwas nin mga pahayag kan mga pinangaranan ni Co.
Pighayag man ni Castro an saiyang pagkadismaya sa desisyon kan komisyon sa dae pag-livestream kan saindang pagdangog asin an pagdepende suboot sa witness kun mawot ipahiling sa publiko an pagbale kaini sa hearing.
