LEGAZPI CITY- Nagrarahay na an kamugtakan kan panahon sa provincia kan Catanduanes kasunod kan naeksperyensyahan na mga pag-uran kasuudma huli sa epekto kan raot nin panahon.
Segun ki Catanduanes Weather Specialist Jun Pantino sa intrevista kan Bombo Radyo Legazpi na nagkakawsa man nin mga biglang pag-uran an shearline.
Mientras tanto, basado sa forecast kan ahensya, pigkakarkulo na nasa duwang raot nin panahon pa an posibleng maglaog sa Philippine Area of Responsibility antes matapos an presenteng taon.
Huli digdi, pinaghahanda kan ahensya an publiko sa mga posibleng epekto kan pinag-aandaman na raot nin panahon.
Nagpagirumdom man si Pantino na dae basta-basta magtubod sa mga nagluluwas na bako beripikadong impormasyon sa social media na posibleng magkawsa nin warang basehan na pagkahadit sa publiko.
