LEGAZPI CITY- Nagsakat pa sa maabot sa 600 na mga pasahero an stranded sa pantalan kan Pio Duran, Albay makalihis makanselar an biyahe huli sa tropical depression Verbena.
Segun ki Pio Duran Municipal Disaster Risk Reduction and Management Office head Noel Ordoña sa intrevista kan Bombo Radyo Legazpi na puon pa kasuudma, dae na tinugutan an pagbiyahe kan mga barko pasiring sa provincia kan Masbate huli sa nakabanderang tropical cyclone wind signal.
An nasabing datos an pinaglalaoman man na madudugangan pa sa masunod na mga oras.
Afuera sa mga stranded passengers, naantala man an biyahe kan maabot sa 200 na mga delivery trucks, mga bus, pribadong mga behikulo asin iba pa.
Huli digdi, sinabi kan opisyal na pano na an holing area kan pantalan asin halawig na man an pila kan mga behikulo sa tinampo.
Mientrastanto, sinierto ni Ordoña na preparado man an lokal na gobierno sa pagtataong asistensya sa nasabing mga stranded na pasahero.
