LEGAZPI CITY—Binawian nin buhay an sarong lalaking nuébe anyos, grade four student makalihis na malamos sa kadagatang parte kan Barangay Tablac, Matnog, Sorsogon.
Segun ki Matnog Municipal Police Station Chief of Police Police Captain Wilfred Lloyd Berdin, sa intrevista kan Bombo Radyo Legazpi, makalihis na maresibe an report an tulos sindang nagpasiring sa pinangyarihan kan insidente asin nagresponde kaiba an personahes kan Philippine Coast Guard, Bureau of Fire Protection, Municipal Disaster Risk Reduction and Management Office Matnog, Barangay Emergency Response Team, asin Regional Mobile Force Battalion 5.
Mantang nagkakawat suboot an biktima sa sarong bangka na yaon sa nasambitang baybayon an tinamaan ini nin makusog na hukol rason kun nata nahulog ini sa nasabing bangka.
Huli sa makusog na hukol dinara an joven sa mas hararom na parte kan kadagatan.
Dugang ni Berdin na uminabot suboot nin sagkod anom na oras an isinagibong rescue operation kan mga otoridad huli sa malabog na tubig sa nasabing lugar.
Tulos man na dinara an biktima sa Matnog Medicare Hospital alagad idineklara ining dead on arrival kan attending physician.
Mientrastanto, pagiromdom man kan opisyal sa mga magurang na dae pagbayaan na magkawat an saindang mga aki harani sa kadagatan asin dapat na pagbantayan nganing maibitaran an siring na insidente.
