LEGAZPI CITY – Ipigdoon kan August Twenty One Movement na kasado na an saindang Nov. 30 anti-corruption rally.
Segun ki August Twenty One Movement President Volt Bohol sa intrevista kan Bombo Radyo Legazpi piglalaoman ninda na madakol pa an makikisumaro sa ikaduwang Trillion Peso March kompara sa naenot na rally na isinagibo kan September 21.
Bako lang suboot sa EDSA an mangyayaring anti-corruption drive kundi igwa man na nakakasang hiro protesta sa manlain-laing parte kan nacion nganing mangapodan nin paninimbagan sa nangyayaring corruption sa gobierno.
May mga nagkapirang grupo man na mangangapodan man sa gobierno na ipasa an Anti Political Dynasty Law na nakatalaang isagibo sa Luneta Park huli ta nagtutubod sinda na an political dynasty an nagigin kawsa kan katiwalian.
Pigtaram pa kan opisyal na kun magpapadagos an pagkakasararo kan publiko an makakatabang nganing magbunga nin magayon an saindang pangapodan nin pagbabago.
Nagtutubod man siya na dae nagpundo an namamanwaan na kalampagon an gobierno poon pa kan i-archived kan senado an impeachment case ni Vice President Sara Duterte.
Dae man dapat suboot matapos an pagbabantay kan mga Pilipino sa satuyang gobierno maski may mga nakulong huli ta tradisyon na kan mga nagtutukaw sa pagka-presidente an pagtatao nin pardon sa mga nakulong na pulitiko.
Naglalaom si Bohol na gigibuhon kan gobierno an gabos nganing maisakatupadan an ipigtao nindang promesa na may makukulong na poderosong tawo na imbwelto sa korapsyon sa flood control projects antes magsapit an kapaskuhan.
