LEGAZPI CITY-Kinumpirma ni Presidential Anti-Organized Crime Commission (PAOCC) Spokesperson Winston Casio na presenteng nang nagmamawot an gobierno sa International Criminal Police Organization (Interpol) na magisyu nin sarong red notice laban kay dating presidential Spokesperson Atty. Harry Roque.
Sinabi niya na psoibleng difisil an magigin proseso kaini huli sa mga pigpapahiling asin pigpapakalat niya na siya an sarong biktima suboot kan sarong political prosecution.
Nanindugan man si Casio na wara nin basehan an mga pahayag ni Roque asin an gabos na mga proseso, basado sa mga pisikal na ebidensya laban sa saiya.
Marurumduman na kan Mayo, nagpaluwas an mga otoridad nin warrant of arrests laban ki Roque, kay Lucky South 99 representative Cassandra Li Ong asin sa 48 iba pa huli sa kasong qualified trafficking asin sa iligal na operasyon kan Philippine Offshore Gaming Operations (POGO).
Segun sa ahensya na nakakuwa sinda nin mga ebidensya na magpapatotoo na nagkaigwa nin human trafficking sa laog kan Lucky South 99 gaya siring kan torture, kidnapping, asin sex trafficking kung sain nailigtas an dai mababa sa haros 158 na mga empleyado kaini.
Mientrastanto, naenot na man na pignegaran ni Roque an mga alegasyon saiya asin nanindugang wara siyang kinaaraman sa mga nasabing iligal na operasyon.
