LEGAZPI CITY – Magigin exciting suboot para sa sarong political analyst an mga mangyayari mapadapit sa orolay sa korapsyon sa gobierno sa mga masunod na aldaw.
Ini an kasunod kan nagin pagsiwalat ni Former Congressman Zaldy Co kun sain inakusaran kaini si Presidente Ferdinanad Marcos Jr. asin an pinsan kaining si dating Speaker Martin Romualdez kaiba an nagkapirang members na nag-insert nin P100-bilyon hale sa national budget.
Segun ki Bicol University-Political Science Department and Far Eastern University Prof. Amr Solon Sison sa intrevista kan Bombo Radyo Legazpi na huli sa expose ni Co an mas lalo sana ining makawsa nin mas kadakol na mga hiro protesta na naghahagd nin paninimbagan sa mga opisyales na imbwelto sa korapsyon asin magpababa kan kompyansa kan publiko sa saindang liderato.
Matatamaan man kan nasabing rebelasyon an approval rating ni PBBM asin an iba pang mga pwedesir na magdalagan sa Presidential Election sa 2028 kun sain may padiit-diit nang nagbubulusok pababa asin an iba man an igwa na nin pagtaas.
Pigtaram pa kan opisyal na kun pag-oolayan an pulitika, parte na an flood control issue sa “game-plan” kan nagkapirang lideres nganing maraot sa mata kan publiko an imahe kan pangaran kan sarong opisyal na nagmamawot na magtukaw sa mas halangkaw na posisyon.
Maski suboot matapos an nasabing kariribukan sa pulitika, magkakaigwa man giraray nin manlain-laing alyansa kun sain an dating magkakaiwal an pwedesir na magkampihan asin dating magkakampi an pwedesir nang magbanggaan sa parehong posisyon.
Pagdoon pa ni Sison na maski anong gibuhong pagpapanimbag an dae man liwat matatangal an korapsyon sa mga hanay kan gobierno kundi an kaipuhan suboot iyo an maray na pagmamanehar kan mga proseso mapadapit sa paggamit kan pondo kan banwaan.
