LEGAZPI CITY-Kadikit an nanotarang danyos sa Tabaco City sa Albay makalihis an panrarapado kan Super Typhoon Uwan.
Segun kay Tabaco City Disaster Risk Reduction and Management Office Head Gel Molato, sa intrevista kan Bombo Radyo Legazpi na minimal an nagin danyos sa saindang ciudad alagad wara pa nin suplay nin kuryente asin tubig sa bilog na ciudad.
Nagtetenir man na maluya an cellular signal sa lugar kairiba na an mga telcos sa ciudad.
Nagpapadaos pa man giraray an saindang assessment sa saindang ciudad, afuera sa banwaan kan Tiwi asin Malinao kun sain igwa suboot na mga nagturumbahan na mga poste.
Nakapag-decamp na man an ciudad nin nasa 7126 na mga pamilya.
Mientrastanto, nakashelter pa an mga barko sa Tabaco Port kun sain pigpapahalat pa an signal warning ngani magkaigwa na nin mga pag-biyahe.
Dugang pa kan opisyal na wara man nin danyos na dara an storm surge sa ciudad kan Tabaco.
Nangangapudan man an opisyal sa ALECO na ma-restore na an mga linya sa distrito huli sa importante suboot ini ngani mamati na kan mga residentes an early recovery pagkatapos kan pananalasa kan nasabing pagbagyo.
Mientrastanto segun sa Tabaco City Disaster Risk Reduction and Management Office, wara man sindang naresibeng report mapadapit sa naglubog na motorbancas sa ciudad huli sa hasta suboot ini naipapaabot sa operation centers an wara man ini sa saindang opisyal na rekord.
