LEGAZPI CITY – Pigtarabangan kan mga residentes asin otoridad na malinigan an kahalabaan kan Legazpi City boulevard na sakop kan Barangay Puro makalihis an kadakol na basurang dinara kan makukusog na mga ukol kan dagat.
Segun ki Task Force Kalinigan at Kaayusan Head Mark Andy Marbella sa intrevista kan Bombo Radyo Legazpi na nalinigan tulos an lugar huli sa nagkasararong paglinig kan saindang ofisina kabale na an Office of the City Environment and Natural Resources, City Engineers Office asin mga residentes.
Antes an paglilinig an may saro suboot na behikulo an napako huli sa mga inanod na mga materyales na tinalyap sa tinampo.
Nagin madali man an saindang paglinig huli ta ginamitan na ini nin backhoe nganing marikas na mabugtak sa garbage truck an mga basurang inanod.
Nagpapasalamat man an opisyal na nakisama an panahon sa clearing operation nganing tulos ining malinigan asin dae na magkawsa nin abala sa mga motorista.
Komon na suboot na nangyayari sa Barangay Puro an kaparehong insidente urog na kun hightide asin barado an mga kanal.
Pagirumdom niya man sa mga naka-istar harani sa salog asin dagat na halaton na sana na kuwaon an saindang basura kan mga eco-aide nganing dae man masakitan an lambang saro.
Pagdoon man ni Marbella na disiplina an kaipuhan nganing dae na mautro na nagbabalik man sana sa komunidad an mga basurang ipigtapok ninda sa dagat asin salog.
