LEGAZPI CITY – Padagos na pigbabantayan kan state weather bureau an paghiro ni Bagyong Ramil kun sain presente pa ining nasa laog kan Philippine Area of Responsibility.
Segun ki Philippine Atmospheric, Geophysical and Astronomical Services Administration (PAGASA) Southern Luzon Weather Forecaster Dan Triumfante sa intrevista kan Bombo Radyo Legazpi na nagtetenir na nasa laog kan Tropical Cyclone Wind Signal an northern asin western portions kan Camarines Norte partikulamente na an mga banwaan kan Santa Elena, Capalonga, Jose Panganiban, Labo, asin Paracale.
Basado man suboot sa forecast track an piglalaomang maluwas sa laog kan Philippine Area of Responsibility an nasambitang bagyo saagang aga (Oct. 20) asin laoman nang padiit-diit nang magayon an kamugtakan kan panahon sa rehiyon Bikol.
Ipig-eksplikar man kan nasambitang Weather Forecaster an nangyaring paglihis kan bagyo kun sain enot nang napabareta na ma-landfall dapat ini sa Catanduanes.
Segun pa saiya na nagbaba suboot si Ramil huli sa High Pressure Area na nagin rason kun ngata pigtumbok kaini sa provincia kan Sorsogon sagkod sa mag-landfall sa banwaan kan Gubat.
Pagirumdom ni Triumfante sa publiko na permihang mag-antabay sa mga state weather bureau mapadapit sa kamugtakan kan panahon asin magsunod sa abiso kan saindang mga lokal na gobierno enkaso igwang bagyo asin iba pang klase nin kalamidad.
