Ibinuyagyag ni Cavite 4th District Representative Kiko Barzaga an report gikan sa saiyang intelligence network katakod sa closed door investigation kan Independent Commission for Infrastructure (ICI).
Sa social media post ni Barzaga, basado suboot sa report, maserbi suboot bilang state witness si dating House Speaker Martin Romualdez.
Kun saen kakaladkaron suboot ni Romualdez asin mangangapudan sa pag-aresto kina Senator Chiz Escudero, Joel Villanueva, Jinggoy Estrada, Mark Villar, na nagserbing dating kalihim kan DPWH mantang pigprotehiran gikan sa imbestigasyon an saindang mga kaalyado sa Kamara kabale na sinda Presidential son asin Cong. Sandro Marcos, Jay-Jay Suarez, Roman Romulo, asin Zia Adiong.
Sabi pa kan lehislador na igwang mga report na pigplano suboot kan Commission on Elections (Comelec) na ideklarang warang bisa an resulta kan eleksyon kan 2022. Ini nganing madiskwalipika si Vice President Sara Duterte en kaso mapatalsik si Presidente Ferdinand Marcos Jr.
Alagad nilinaw man ni Cong. Barzaga na an nasabing mga report an pawang mga espekulasyon sana gikan sa foreign intelligence.
Segun pa sa lehislador, padagos suboot an pagtaklob kan ICI sa katotoohan katakod sa saindang mga imbestigasyon, kung kaya maserbi suboot siya bilang mata kan namamanwaan.
Mientrastanto, naenot na man na pignigaran kan Department of Justice (DOJ) an pagkokonsidera ki Romualdez bilang state witness.
Susog sa ahensya warang ipigsusunad na aplikasyon an dating House Speaker sa DOJ para maging state witness. Ipigdoon man kan ahensya na wara sindang papalagpason en kaso mag-isyu nin warrant sa mga imbuelto sa korapsiyon sa maanomalyang mga proyekto.
Naenot na man na pignigaran ni Romualdez na nakaresibe siya nin kickbacks sa infra projects asin sinabing an pagdawit saiya sa isyu an sarong gibo-gibo sana.
