Nagpromesa an Hamas na saindang ibabalik an gabos na mga nagadan na bihag sa Gaza na dae pa nahahanap makalihis makamate nin matinding danyos an nasambitang teritoryo makalihis an duwang taong giyera.
Segun kay Senior Hamas official Ghazi Hamad, kumplikado an paghahanap sa mga hawak asin kakaipuhanon nin bastanteng panahon urog nang binago suboot kan labanan an landscape kan Gaza.
Matalima suboot sinda sa kasunduan arug kan saindang ipigpromesa.
Base sa Gaza’s civil defense agency, sarong rescue force na nago-operate sa irarom kan Hamas authority, labi 280 na hawak na an narekober hale sa mga naraot na istruktura poon kan magin epektibo an ceasefire.
Mientrastanto, kan Biyernes na banggi, Oktubre 17, itinao man kan Hamas an mga hawak kan saro pang nagadan na bihag na Israeli.
Kinumpirmar kan Israeli Defence Forces ngonian na Sabado, Oktubre 18, na isinagibo sa Gaza an pagturn-over sa Red Cross nin kabaong na may laog kan hawak kan nasambitang Israeli hostage
Ineskortan ini kan mga tropa kan IDF sa pagbalyo sa border pasiring sa Israel saka idiniretso sa National Institute for Forensic Medicine sa Tel Aviv para sa pag-aram kan identidad kan biktima.
Ini na an ika-sampulong bangkay kan binihag na Israeli na ipinasakamot kan Hamas ngoniang semana, hale sa kabilugang 28 nagadan na mga bihag na obligadong ibalik kan grupo bilang parte kan enot na parte kan Gaza peace plan.
