Itinala kan Korte Suprema an letter-petition na naghahagad sa korte na liwat na ikonsidera o pag-adalan an nagin ruling kaini na nagdedeklarang unconstitutional sa impeachment complaint laban ki Vice President Sara Duterte.
Sa notice na may petsang Agosto 12, nagdesisyon an Supreme Court En Banc na i-note o itala an nasabing letter-petition na may petsang Agosto 5, 2025. Base sa notice, pinirmahan ini kan manlaen-laeng mga indibidwal, na nagpapahayag kan saindang pagkontra sa desisyon kan Korte.
Hinagad man ninda sa kataas-taasang hukuman an pagkundusir nin oral argument katakod sa nasabing pag-uulay.
Magigiromdomang kan Hulyo idineklara kan Korte Suprema na nagbalgar sa ley an articles of impeachment laban sa Bise Presidente.
Kun saen binalgar kaini an “one year bar rule” o an sugo kan saligang batas na sarong impeachment complaint sana an pwedesir isunad kontra sa sarong opisyal sa laog nin sarong taon.
Alagad nilinaw man kan Korte Suprema na dae kaini inaabswelto an panduwang presidente hale sa mga reklamo laban saiya.
