LEGAZPI CITY—Posibleng dae na ma-imbestigaran si Zaldy Co kan lower chamber ethics committee makalihis na magbutas ini bilang miyembro kan mababang kapulungan kan Kongreso.
Segun ki Far Eastern University Professor/Political Analyst Amir Solon Sison, sa intrevista kan Bombo Radyo Legazpi, na an pagbutas sa pwesto ni Co an pwedesir na magtao saiyang oras na maggibo nin master plan nganing makapagkrear nin sarong maray na depensa sa saiyang ngaran.
Sa nangyaring pagbutas kan kongresista, posible suboot na mangyari an hahalaton na sana an kaso sa Ombudsman o sa Korte nganing hampangon niya bilang sarong private citizen an mga akusasyon ipigtatapok saiya.
An pagbutas ni Co an pwedesir man suboot na maray na lakdang para sa Ako Bicol party-list huli sa pwedesir sindang mag-move on sa kontrebersyal na kongresista—siring kan ginibo ni dating House Speaker Martin Romualdez kan siya nagbutas sa posisyon bilang lider kan Kamara nganing mairayo an kapulungan gikan sa mga alegasyon nin katiwalian na pigdadawit saiya.
Alagad, segun man ki Sison, na dapat mag-uli sa Pilipinas si Co asin hampangon an akusasyon saiya bilang kongresista man o sarong private citizen.
Mantang wara pa suboot na ipigsunad na kaso kontra sa kongresista an pwedesir na ini an magbawas sa pressure na paulion siya sa nacion huli sa dae na siya sakop kan ethics committee, alagad pwedesir na maiba an sitwasyon en kaso may opisyal nang isinunad na kaso laban saiya sa Korte.
Dugang pa kan political analyst na en kaso man suboot na dae nagbutas si Co magkakaigwa siya nin dugang na kasong hahampangon sa ethics committee, afuera pa sa isinunad na ethics complaints ni Navotas Rep. Toby Tiangco kontra saiya.
Bako man suboot patas para sa partylist na madawit sa isyu kaya saro ining maray na paagi sa bagong maribay ki Co na magpokus sa pangenot na agenda kan Ako Bicol party-list.
