LEGAZPI CITY – Padagos an pigsasagibong assessment kan Office of the Civil Defense Bicol mapadapit sa mga danyos asin casualty na ipigwalat makalihis an pangrarapado ni Bagyong Opong.
Segun ki OCD Bicol Spokesperson Gremil Naz sa intrevista kan Bombo Radyo Legazpi na puga-puga na an pagtatao nin tabang kan mga national government nganing maparikas an pagrecover partikulamente na an provincia kan Masbate na labing napuruhan kan paghugpit kan naunambitang bagyo.
Basado sa saindang latest monitoring an uminabot na sa 9 katawo an kumpirmadong binawian nin buhay sa Masbate Province kun sain 1 an nairehistro sa Masbate City, 1 sa Monreal, 1 sa Batuan, 2 sa Cataingan, 2 sa Placer asin 2 man sa Uson.
Kadaklan sa mga nairehistrong pagkagadan an huli sa pagkalamaos, natumbahan nin kahoy, nabagsakan nin debris mantang may saro man na inatake sa puso sa kasagsagan kan pananalasa ni Opong.
Pigtaram pa kan opisyal na uminabot na sa P31.9M an nairehistrong danyos sa imprastraktura sa enterong kabikolan kun sain P31.4M an nairehistro sana sa provincia kan Masbate mantang an natatada man an gikan sa provincia kan Sorsogon.
Dae man ninda pighahale an posibilidad na madudugangan an mga datos urog nang nagpapadagos an validation kan mga kaniya kaniyang lokal na gobierno mapadapit sa kabilugang danyos sa saindang lugar.
Sa presente pigtaram pa ni Naz na nasa 19 sa 21 Local Government Unit sa Masbate an nagtetenir na wara pang supply nin kuryente mantang wara na man na nairehistrong stranded na pasahero sa mga pantalan sa rehiyon.
