LEGAZPI CITY—Nagpaotob nin pre-emptive evacuation sa mga residentes an lokal na gobierno kan Pio Duran, Albay huli sa mga posibleng epekto kan bagyong Opong.
Segun ki Municipal Disaster Risk Reduction and Management Office Pio Duran Head Noel Ordoña, sa intrevista kan Bombo Radyo Legazpi, partikular nindang ipina-ebakwar an mga residente kan Sitio Lagaan, Barangay Banawan huli sa wara sindang ibang maaagihan afuera sa nagabang tulay durante kan bagyong Kristine kaya en kaso suboot na magkusog na an pag-uuran asin maghalangkaw an lebel kan tubig sa Panganiran River dae na makakaluwas an mga residente kan nasambitang lugar.
Segun saiya na nag-abot na sa pocomas o menos na 500 indibidwal an saindang nang napa-ebakwar gikan sa Sitio Lagaan asin nagtetenir ngunyan sa designated evacuation center sa nasambitang banwaan.
Dugang kan opisyal na may nairehistro na man na na-stranded na mga pasahero sa Pio Duran port.
Naka-preposition na man segun saiya an mga food packs na ibabarewas sa mga residentes magin sa na-stranded na mga pasahero.
Mientrastanto, abiso ni Ordoña sa namamanwaan na solamenteng magtubod sa mga impormasyon gikan sa lehitimong ahensya kan gobierno mapadapit sa preparasyon sa nasabing bagyo.
