Tinawan-doon kan Department of Justice na magtetenir na ‘confidential’ an anumang napag-olayan pag-abot kan mag-agom na Curlee asin Sarah Discaya sa kagawaran ngunyan na aldaw.
Nagsayuma si Department of Justice Sec. Jesus Crispin Remulla na idetalye an nangyaring pakikipag-ulay kan mga Discaya saiya.
Magtetenir suboot na pribado ini asin sisiertohon na dae makakaluwas sa publiko ang mga ipigheras na impormasyon kan mag-agom na Discaya kan nagbisita sa kagawaran.
Pagdoon kan opisyal na parte ini kan proseso asin nakabugtak sa ley an mapadapit sa ‘witness protection program’ na pwedesir hagadon kan sisay man na mawot na magtestigo sa maanomalyang flood control projects.
Mantang sa orolay man nin restitution o an posibilidad kan pagbalik kan mga Discaya sa suboot mga nakuang yaman kun igwa, nagnigar man an DOJ secretary na magheras nin impormasyon mapadapit digdi.
Nanindugan man si Justice Sec. Remulla na magtetenir na pribado o confidential an saindang mga pinag-olayan sa pag-abot kan mga Discaya sa Department of Justice.
Kaya an kahagadan kan mag-agom na Discaya na maisararom sa ‘witness protection program’ an maagi pa sa hararom na ebalwasyon o proseso.
Segun ki Remulla, dae pa ini tulos na masasagibo huli sa hihilingon asin ibeberipika pa ang mga pahayag o impormasyon na ipegheras kan mag-agom.
Kasunod kaini ipigheras man ni Justice Spokesperson Mico Clavano na saindang bubusisiion nin mahigot an sisay man na mawot na magtestigo mapadapit sa maanomalyang mga proyekto.
Kaya inengganyar niya an mga ini na ibuyagyag na sana an bilog na katotoohan asin kun dae an pwedesir magkaproblema an aplikasyon para sa witness protection program.
