LEGAZPI CITY – Padagos an monitoring kan sarong toxic watchdog group mapadapit sa mga kawatan na ipigtitienda sa mga nagkapirang bakalan makalihis manotaran an pagkaka-igwa nin kemikal na lead sa pirang mga toy cars.
Segun ki BAN Toxics Campaigner Thony Dizon sa intrevista kan Bombo Radyo Legazpi na puga puga sinda ngonian sa monitoring asin testing huli ta nagdadangadang na an kapaskuhan kun sain nagruruso an mga konsyumer nganing magbakal nin kawatan nganing ipang-regalo sa mga kaakian.
Kompara suboot kan dati an mas mahigot an saindang pagbabantay kun sain piggigibo na ninda ini kada semana huli ta narisa ninda ngonian na nag-iiba-iba an mga klase kan produktong pang-aki na nagtataong huma asin peligro kun dae nabantayan.
May mga na-ireport na man sindang produkto sa Food and Drug Administration nganing matawan ini nin magkakanigong aksyon mapadapit sa pagpapabakal kaini.
Pigtaram pa kan opisyal na makalihis ninda ireport sa FDA an saindang nadiskubre an ipigsasapubliko ninda an mga produkto nganing maaraman kan konsyumer na delikado para sa tatawan ninda an mga kontaminadong kawatan.
Kadaklan man suboot sa mga nakukumpiska nindang kontaminadong kawatan an napag-aramang barato sana kun kaya kadakol an nag-aaprobitsar kan mga ini urog na kun kadakol an saiyang reregaluhan.
Pagdoon niya man na an mga siring na produkto an bagsak na sa toy engage safety labeling law huli ta bako kompleto an saiyang impormasyon na masirbi kutang basehan kan mga konsyumer kun ligtas an saiyang babakalon.
Pagirumdom man ni Dizon sa mga konsyumer na dapat hilinon ninda kun kompleto an impormasyon kan kawatan, ingredients, hazard signs, may liscense ro operate number asin iba pa.
