LEGAZPI CITY-Inaprubahan na ni Senate President Francis “Chiz” Escudero an pagpapaluwas kan subpoena laban sa limang kontratista asin tulong opisyal kan Department of Public Works and Highways (DPWH) ngani piriton sindang mag-atendir sa pagdangog sa Setyembre 8 katakod kan mga iregularidad sa flood control projects sa manlain-lain na parte kan nacion.
Kasunod ini kan rekomendasyon ni Senate Bue Ribbon Committee Chairman Senador Rodante Marcoleta, kung sain pinirmahan kan liderato kan Senado an mga subpoena ad testificandum para sa mga masunod na indibidwal.
Kairiba digdi si; Darcy Kimel D.J. Respicio, general manager kan Darcy & Anna Builders and Trading; Sally N. Santos, may sadiri asin manager kan SYMS Construction Trading; Pacifico F. Discaya II, authorized managing officer kan Alpha and Omega Gen. Contractor & Development Corporation; Maritoni P. Melegrito, authorized managing officer kan Elite General Contractor and Development Corporation;
Edgardo Saggum, may sadiri asin manager kan Eddmari Construction and Trading; Engr. Jaypee D. Mendoza, hepe kan construction division, Bulacan 1st District Engineering Office asin empleyado kan DPWH; Engr. Brice Ericson D. Hernandez, dating assistant district engineer, Bulacan 1st District Engineering Office, asin empleyado kan DPWH; Engr. Juanito C. Mendoza, accountant III, Bulacan 1st District Engineering Office, asin empleyado kan DPWH.
Inaprubahan man ni Escudero an subpoena na nakapangaran kay Commission on Audit (COA) Chairman Gamaliel Cordoba para sa pagsusumiter kan fraud audit highlights kan ahensya katakod kan saindang pagrepaso sa mga flood control projects kan DPWH, kairiba an mga tugon kan mga respondent sa nasabing mga impormasyon.
Magigirumduman na kan lunes, pinoonan kan Senate Blue Ribbon Committee an imbestigasyon sa flood control projects na suboot hababa an kalidad o dai man talaga natapos.
