Sarong makahandal na pangyayari an nangyari sa Florida makalihis na gamiton an super glue sa sarong dental procedure.
Susog sa mga bareta, sarong 35-anyos na babae sa Florida, U.S.A., an inarestar kan mga awtoridad makalihis na akusaran siya na naggigibo nin mga dental procedures na warang lisensya, kabale an pagbugtak nin mga dental veneer gamit an super glue.
Nabisto an babae na si Emely Martinez, nagpamidbid kan saiyang sadiri bilang sarong “smile makeover expert” sa social media asin naka-enganyar nin mga kliyente sa paagi nin pag-ofresir nin baratong full-mouth veneer treatment na nagkakantidad sana nin $2,500.
Alagad nabuyagyag an saiyang modus operandi makalihis na magreklamo an duwa sa saiyang mga kliyente nin grabeng danyos sa ngipon, impeksyon, asin kulog nin ngipon.
Napag-araman ninda sa mga tunay na dentista na an saindang mga veneer an ipigkabit sana gamit an “Krazy Glue,” sarong tatak nin Super Glue.
Si Martinez, na dati nang naaresto huli sa parehong krimen, ngonyan napapaatubang sa kasong fraud asin practicing dentistry without an active license.
