LEGAZPI CITY-Nabigla an sanggunian kan Barangay Maninila sa Guinobatan Albay an pagkakadiskubre kan sarong flood control project sa saindang lugar mantang dai man suboot ini nagagi sa saindang aprobasyon.
Segun kay Kagawad Haydee Padua kan Barangay Manninila, sa intrevista kan Bombo Radyo Legazpi, na dai ninda suboot aram na sainda an flood control project asin kan magduman sinda sa Department of Public Works and Highways an pigsasabing para ini sa Barangay Masarawag sa Guinobatan Albay.
Dugang pa kan Kagawad na naaraman sana ninda na para sa barangay ninda ini, kan pinaapod an saindang kapitan.
Dai man suboot nagagi sa sarong konsultasyon kaini alagad pig-insistir man suboot ninda na sainda an nasabing proyekto.
Dugang pa kan Kagawad na nagin kawsa man ini kan pagbabaha sa saindang lugar, kun sain nagdakula suboot an saindang salog huli sa nasabing flood control.
Laoman man sa presente kan saindang sanggunian na magkaigwa nin tulay sa saindang lugar huli sa nadidifisilan sinda sa pagagi kan mga transportasyon enkaso igwang pagbabaha na dara kan makukusog na paguuran.
Sa presente, preparado man suboot sinda enkaso magkaigwa nin pag-kwestyun manungod sa nasabing flood control project.
