LEGAZPI CITY – Nagnegatibo sa mga isinagibong pangduwang random drug testing kan Philippine Drug Enforcement Agency an gabos na driver sa Legazpi City Grand Terminal.
Segun ki Land Transportation Franchising and Regulatory Board Bicol Director Joel Defeo sa intrevista kan Bombo Radyo Legazpi na presente man siya sa isinagibong mga drug testing asin pinagtarabangan an inisyatiba kan Land Transportation Office Region 5, LTFRB asin PDEA nganing masyerto an salbado asin drug cleared na transport sa rehiyon.
Importante suboot an mga random drug testing nganing mapanatag an mga byahero na an mga driver sa lado kan public transportation an magtenir na drug free.
Pighihiling man ninda ini bilang magayon na development huli ta wara ngonian na nag-positive na mga driver bako sana sa ciudad kundi magin sa enterong rehiyon.
Nagpasalamat man an opisyal sa mga driver huli ta nagtatalima sinda sa mandato kan gobierno na dae maggamit nin ipinagbabawal na droga asin sa pag-kooperar sa isinagibong drug test nin warang halong pamimirit.
Kun enkaso suboot na may magpositibo an sarong driver sa mga random drug testing, pwedesir ining sunadan nin suspension order kan LTO sagkod sa confirmatory testing alagad kun mapatunayan talagang positibo sa confirmatory test an mahampang na ini sa revocation kan saiyang lisensya.
Pangapodan man ni Defeo sa mga trucking asin bus company na sunudon an saindang mandato mapadapit sa maximum driving hours nganing malikayan an paggamit kan ilegal na droga na pigtutubudan suboot na pampatanggal ki pirut.
