Gadan an sarong 12 anyos na daragita makalihis na tamaan kan pigtutubudang granada na saiyang pinurot hale sa likod kan saindang harong sa Barangay Labangal, General Santos City.
Segun sa report, nabigla an pamilya asin mga pagtaraid sa makusog na pagsabog na nadangog hale sa likod kan harong kan biktima.
Tulos sindang nagduman sa pinangyarihan kan pagsabog asin nadukayan an aki na nakahigda sa duyan, wara nang buhay asin haros dae na mabisto huli sa grabe kan mga lugad.
Segun sa matuang tugang na lalaki kan biktima, napurot suboot kan aki an sarong lata na pigtutubudang may laog na pampasabog.
Mantang siya pasiring sa duyan, biglang nagputok an nasabing lata.
Nagdududa an mga awtoridad na posibleng granada an laog kan lata, na posibleng bakong tama an pag-tapok kan siisay man na dating kagsadiri.
Napag-araman na nagkaigwa nin dating iriwal sa daga sa lugar, asin kan nakaaging bulan, igwa man nin naenot na report na may rifle grenade na nakua sa haraning lugar.
Padagos pa an pigkokondusir na imbestigasyon kan mga otoridad huli ta pighihingowa man nindang makua an lado kan barangay dapit sa insidente.
