LEGAZPI CITY – Nakakatabang man suboot sa mga residentes an mga pigsasagibong flood control projects sa Barangay Bogtong, Legazpi City tuyong nagkakaigwa nin pagbabaha sa panahon nin tag-uran.
Segun ki Barangay Captain Joel Ador sa intrevista kan Bombo Radyo Legazpi na nasa 70% nang tapos an 280 meters na proyekto sa lugar na pinunan pa nin haros limang bulan na an nakaagi.
Piglalaoman man suboot kan mga residente an nasabing proyekto huli ta ini an nagseserbi bilang proteksyon nganing dae magrasay an daga na pigtutugdukan kan saindang harong.
Afuera sa pigsasagibong proyekto an igwa pang flood control project asin pagpapakarhay nin dike an nakatalaang itugdok na nagkakantidad nin P3 Million nganing sulusyonan an pagbabaha sa saindang eskwelahan kada pig-uuran an ciudad.
Abiso pa kan opisyal sa mga motoristang nag-aagi sa saindang mga kakalsadahan na magtenir na sana sa saindang mga harong kun bako man importante an dudumanon nganing makabawas sa build-up kan trapiko sa saindang lugar.
Nagmamawot man si Ador na kompletuhon na kan Department of Public Works and Highways 2nd District an proyekto nganing kompleto nang mapakinabangan kan saindang lugar huli ta may gap pa an mga ini na pwedesir laugon nin tubig baha na makawsa man kan pagkaraot kan proyekto asin pagkasayang kan pondo.
