LEGAZPI CITY—Padagos na nakaalerto an Municipal Disaster Risk Reduction and Management Office Camalig huli sa padagos na naeeksperyesyahang pag-uuran sa lugar.
Segun ki MDRRMO-Camalig Municipal Government Department Head I Rommel Negrete, sa intrevista kan Bombo Radyo Legazpi, pigmo-monitor ninda an mga river channels asin lahar channels sa parte kan Mayon unit area; magin an mga flood prone asin landslide prone areas.
Segun ki Negrete, na saindang pigbabantayan an mga Mayon unit areas na kun saen posibleng magkaigwa nin lahar flow partikular na an Barangay Tumpa, Soa, Quirangay, Salugan, Anoling asin porsyon kan Barangay Gapo, Ilawod, Libod, Tagaytay, Ligban, asin Bariw.
Afuera digdi, pigmo-monitor ninda an mga lugar na kalimitang pigbabaha siring kan barangay Bariw asin porsyon kan Barangay Tumpa, Barangay 6, asin Barangay Ilawod.
Dugang kan opisyal na bastante man an kagamitan kan saindang opisina asin may mga naka 24-hour duty na mga personahes sa emergency operation center nganing makapagtaong asistensya sa mga residenteng nangangaipuhan nin tabang.
Sa presente, padagos man an pakikipagkoordinar kan MDRRMO-Camalig sa mga barangay urog na kun nakakaeksperyensya nin mga pag-uuran sa lugar.
Mientrastanto, pangapudan kan opisyal sa mga residente na makipagkoordinar sa mga opisyales kan saindang barangay, mag-antabay sa updates kan kamugtakan nin panahon gikan sa state weather bureau magin sa lokal na gobierno, siring man na magin alerto urog na pag may maraot na panahon.
