LEGAZPI CITY—Pigkontra kan sarong poll watchdog na ioctaba an Barangay and Sangguniang Kabataan Elections na nakatalaang mangyayari sa bulan nin Disyembre 2025.
Segun ki Legal Network for Truthful Elections Philippines Executive Director Ona Caritos, sa intrevista kan Bombo Radyo Legazpi, an pag-octaba suboot kaini an nagbabayolar sa standard na kun saen dapat periodic asin regular an pagkukundusir nin eleksyon.
Paliwanag kan opisyal na basado man sa Korte Suprema partikular na sa Macalintal vs Comelec, dae man pwedesir na pirmihang mao-octaba an Barangay asin Sangguniang Kabataan Elections, asin en kaso man na ibusol dapat igwa ining may magabat na rason.
Susog pa sa Korte Suprema na primordial an karapatang pagboto kan mga namamanwaan asin kun bako mas magabat digdi an rason kan Kongreso sa kun nata dapat ioctaba an pirilian—boot sabihon warang rason an Kongreso na i-octaba an eleksyon.
Dugang pa kan opisyal na kun madagos an pagka-octaba kan eleksyon, makikinabang digdi an mga incumbent officials urog na an mga pwedesir pang magdalagan sa pirilian.
Pangapudan kan LENTE Philippines ki Presidente Ferdinand Marcos Jr. na i-veto na sana an pigbubusol na nasambitang propwesto huli ta kun mawot talaga na gibohong apat na termino an posisyon dapat dae na kaipuhan pang i-octaba an eleksyon.
Mientrastanto, nakatalaan na pirmahan kan presidente an propwestong pag-octaba kan eleksyon ngunyan na aldaw, Martes, Agosto 12.
En kaso na mapirmahan an propwesto, mangyayari an eleksyon sa enot na Lunes kan Nobyembre 2026.
