LEGAZPI CITY—Nakatalaang mag-orolay an mga opisyales kan lokal na gobierno kan banwaan nin Daraga, Albay kun ipapadagos na an pagbugtak kan pwesto kan Daraga Night Market sa hampang kan Municipal Hall sa nasabing lugar.
Segun ki Daraga Mayor Victor Perete, sa intrevista kan Bombo Radyo Legazpi, na sa saiyang obserbasyon na magayon suboot ining imantenir sa hampang kan munisipyo.
Dugang kan alkalde na obheto kan nasabing lakdang na mapakarhay asin mapagian an bulos kan trapiko sa nasambitang banwaan.
Ini inagi man suboot sa pagpapakonsulta sa mga opisyales kan Daraga Night Market, local police, Public Safety Office, magin sa administrator kan merkado.
Sa presenteng lokasyon kan night market nagdakol man suboot an mga paratienda na gikan sa dating 200 na nagtititinda suminakat na ini ngunyan sa labi 300.
Mientrastanto, nagpupuon an operasyon kan nasabing merkado puon 7:30 nin banggi sagkod alas-3 nin maagahon kun saen may mga nakabantay man digdi na mga personahes para sa pagmantenir kan paz y orden sa lugar.
