LEGAZPI CITY-Magtatao an Estados Unidos nin nasa P13.8 million ngani matabangan an mga biktima kan kalamidad sa Pilipinas na nasa sarong semana nang nasalanta asin naggadan nin nasa 25 katawo asin nagpa-displace sa ribo-ribong mga residente.
An nasambitang US funding, katumbas kan $250,000 na obheto na matabangan an gobierno kan Pilipinas sa life-saving response kaini sa mga sinalanta kan matinding paguuran asin pagbabaha huli sa bagyo asin habagat.
Segun kay US Ambassador Mary Kay Carlson, ipapanao an nasambitang tabang sa paagi kan United Nations World Food Programme.
Ipapanao an US relief aid sa mga komunidad na apektado kan mga pagbaha sa Metro Manila, Northern, Central Luzon asin CALABARZON.
Segun pa sa US envoy, nakikipagkoordinar na an interagency team kan US embassy sa gobyerno kan Pilipinas asin sa WFP para masierto na makakaabot an mga tabang sa mga lubos na nangangaipohan.
