LEGAZPI CITY-Nairehistro an 3 katawo na gadan mantang 3 iba pa an irido huli sa pananalasa kan Severe Tropical Storm Crising asin kan Southwest Monsoon o habagat basado sa National Disaster Risk Reduction and Management Council (NDRRMC).
Hale sa Northern Mindanao an duwang nagadan asin an saro hale sa Davao Region. Mientrastanto, an mga irido hale sa rehiyon kan SOCCSKSARGEN.
3 katawo man an nairehistrong nawawara pa sa western visayas. Segun sa NDRRMC, ipigsairarom pa sa beripikasyon an mga nasambitang insidente.
Basado man sa datos kan ahensiya, nagabot na sa 370,289 na katawo o nasa 120,008 an naapektaran kan nagaging bagyo.
Nasa 22,623 na katawo man an nasa evacuation centers mantang 20,759 katawo pa an pansamantalang nagtetenir sa luwas kan mga evacuation center.
Nasa luwas na man kan Philippine Area of Responsibility (PAR) an Bagyong Crising kan Sabado, alagad segun sa Philippine Atmospheric, Geophysical and Astronomical Services Administration (PAGASA), padagos man giraray na magdadara nin mga paguuran sa nagkapirang parte kan nacion an Habagat.
