Nagsakat na sa 7.5 milyon katawo an naapektaran kan pinagsamang epekto kan mga bagyong Luis, Maymay asin Neneng asin kan habagat, segun sa National Disaster Risk Reduction and Management Council (NDRRMC).
Basado sa pinakahuring datos na nairehistro kan ahensya sagkod Agosto 23, katumpad ini kan labi 2.1 milyong pamilya hale sa Ilocos Region, Cagayan Valley, Central Luzon, Bicol Region, Western Visayas, Zamboanga Peninsula, Cordillera Administrative Region, Metro Manila, Calabarzon asin Mimaropa.
Sa kabilogang bilang, 9,872 pamilya o 34,103 indibidwal an nagtitinir sa mga evacuation center.
Mantang nagtitinir sa 29 ang bilang kan mga nagadan, 19 an nairido asin tulo an nawawara huli sa epekto kan mga weather disturbance.
Nasa 89 lugar man an nagtitinir na nasa irarom kan state of calamity.
Segun pa sa ahensya, nasa 2,600 kaharongan an bahagyang naraot asin 269 kaharongan an dagos na nawasak.
Nag-abot man sa P4.9 bilyon an danyos sa imprastraktura, mantang nasa P1.7 bilyon an nairehistrong danyos sa agrikultura.
Padagos man na mino-monitor kan NDRRMC asin mga lokal na gobierno an sitwasyon sa mga lugar na naaapektaran kan maraot na panahon
