Dae napugulan an paghibi kan sarong mister mantang pig-kukugos an daing buhay na bangkay kan saiyang bados na agom na binawian nin buhay makalihis na mabagsakan kan tuminumbang poon nin niyog durante kan maraot na panahon sa Sitio Talaod, Barangay Ticulon, Davao Occidental.
Binisto an biktima sa alyas na “Lyn”, 23 anyos, asin siyam na bulan na bados.
Basado sa inisyal na imbestigasyon, sibot si Lyn sa paglaba kan marisa kaini an pagyugyog kan sarong halangkaw na poon nin niyog.
Tulos suboot ining nagdulag, alagad nagbalik nganing isalbar an saindang tres anyos na aking lalaki.
Sa kamondoan, natumba an kahoy pasiring sa saindang direksyon, na nagresulta sa tulos na pagkagadan kan babae.
An saindang ataman na ayam nagadan man kaiba ninda.
Segun sa mga awtoridad, pigkakarkulong nasa 15 metros an langkaw kan kahoy, alagad sinasabing hibabaw an tinanoman kaini na posibleng iyo an rason kun tano madali ining matumba huli sa kusog kan duros asin uran.
Dead on the spot si Lyn huli sa grabeng lugad sa payo asin bari sa ibabang tabay.
Sa ngonian, nagpapadagos pa an imbestigasyon kan mga otoridad kun igwang responsable sa insidente.
