LEGAZPI CITY – Tahasang sinabi kan sarong grupo nin mga paraooma na warang aram sa kadifisilang pigkakahampang kan sektor kan agrikultura si Presidente Ferdinand Marcos Jr.
Paliwanag ni Bantay Bigas Spokesperson Cathy Estavillo sa intrevista kan Bombo Radyo Legazpi na warang aram an Presidente sa nangyayaring problema sa nacion na pigkakahampang kan sektor kan agrikultura asin iba pa sa kada pagtaas kan presyo kan mga produktong petrolyo.
Haloy nang nag-aagrangay an sektor kan agrikultura mapadapit sa mga subsidiya huli ta padiit-diit nanng nalulubog sa utang an mga ini.
Nagtutubod siya na nagkakaigwa nin monopolyo sa presyo kan petrolyo huli ta sinabi suboot kan mga fuel company kan nakaagi na igwa sinda nin bastanteng supply alagad an nagtaaasan man an presyo kan saindang mga produkto kan nakaaging martes asin huwebes.
Pigkondena man kaini an nagin pahayag ni Presidente Ferndinand Marcos Jr. na bako signipikante an nagin kariribukan sa midle east sa ekonomiya kan Pilipinas huli ta dakulang epekto na sa mga paraooma an haros singko pesos na pagtaas sa mga produktong petrolyo.
Posible suboot na magtaas man ang production cost arug kan abono huli sa nasabing price hike na dakulang pasanon na naman kan mga paraooma.
Patanid niya man na laoman na an hibabang produksyon sa panahon kan anihan huli sa kawaran suporta kan gobyerno sa mga naapektaran kan mga serye kan pagtaas.
Pangapodan ni Estavillo sa administrasyon na tanggalon an excise tax kan mga produktong petrolyo asin ibasura na an oil deregulation law ta haloy na ining kamawotan kan mga paraooma nganing mapababa na an presyo kaini.
