LEGAZPI CITY-Nagkapirang indibidwal asin grupo kan Samahan ng Ex-detainees Laban sa Detensyon at Aresto (SELDA) an nagprotesta ngonian na aldaw bilang pagrumdom kan International Day in Support of Victims of Torture.
Kung sain sinda nagdiretso sa atubangan kan edipisyo kan Department of Justice sa Padre Faura St. sa ciudad nin Manila ngani madangog an saindang mga agrangay.
Sinabi ninda na ini an saindang pagpapahiling nin pakikisumaro asin paninindogan para sa mga nakaligtas sa torture, sa saindang mga paryentes, asin orog na sa mga preso sa politika.
Hinagad ninda sa saindang demonstrasyon an tulos asin lubos na implementasyon kan mga ley na kontra sa pagpasakit, pag-imbestigar, asin pag-atubang nin kaso sa mga kaso na may kinaaraman sa pagpasakit.
Ini sa ibong kan pag-eksister kan Anti-Torture Act of 2009 asin pagpartisipar kan nacion sa United Nations Convention Against Torture o UNCAT.
Padagos suboot an mga nababareta na krimen na sistematikong piggagamit laban sa mga aktibista, ‘political prisoners’, asin mga ordinaryong namamanwaan kan nacion.
Kaya nangapudan an grupo na paluwason an mga nakakulong na ‘political prisoners’ na suboot nakaeksperyensya nin pisikal asin sikolohikal na pag-torture mantang nasa kustodiya sa bilanggoan.
Nag-iinsistir sinda na imbes na gibohon na sentro nin persekusyon an mga biktima, mas marhay na suportaran sinda ngani makakua nin hustisya asin medikal na pag-ataman o pangangaipo.
Sisiguraduhon suboot ninda an suporta para sa mga biktima nin torture na nasasakitan na makamtan an hustisya na saindang hinahanap.
