Temporaryong isinara kan Kuwait an airspace kaini makalihis na atakehon kan Iran an sarong base militar kan Estados Unidos sa Qatar na sarong insidente na nagpakusog kan tensyon sa Middle East.
Katakod kaini, an Pakistan International Airlines (PIA) nag-anunsyo kan pagkanselar kan saindang mga biahe pasiring sa Qatar, Bahrain, Kuwait, asin Dubai.
Susog sa PIA, an desisyon na ini resulta kan naglalalang tensyon militar sa rehiyon kan Golpo.
Mientrastanto, an Student News Network kan Iran nagbareta na an mga air defense systems sa kabisera kan Iran na-aktibo tanganing magresponde sa “hostile targets” o mga huma sa ere.
An Saudi Arabia makusog na kinondenar an pag-atake kan Iran sa Qatar, na inaapod ining malinaw na pagbalgar sa ley internasyonal asin sa prinsipyo nin marhay na pagtaraid.
Segun man sa Saudi Kingdom, an siring na lakdang kan Iran an bako katanggap-tanggap asin wara nin bastanteng rason sa anuman na konteksto.
Padagos na pigbabantayan kan manlaen-laen na nasyon an sitwasyon mantang nagtitindi an tensyon sa rehiyon.
