Nakahali na an 26 na Pilipino gikan sa Israel sa paagi kan voluntary repatriation program kan Philippine Embassy, susog sa nagin pahayag kan embahada kan Dominggo, Hunyo 22.
Inibahan sinda ni Philippine Ambassador Aileen Mendiola asin kan DMW-OWWA team sa Allenby Border Crossing nganing masierto an maayos na pagbalyo gikan Israel pasiring sa Jordan.
Pig-asikaso man kan embahada an saindang transportasyon, transit visas, travel documents, asin plane tickets.
Bago naghali, nagtenir muna an mga Pilipino sa shelter kan Department of Migrant Workers (DMW) kun saen sinda tinawan nin relief packages, libreng legal assistance, asin orientation para sa saindang reintegration benefits pagbalik sa Pilipinas.
Enot nang nai-report kan Department of Foreign Affairs (DFA), an grupo an kompwesto nin overseas Filipino workers (OFWs) asin sarong turista.
Mientrastanto, nasa proseso na man an ikaduwang batch kan repatriation na kompwesto nin 33 Pilipino.
Magigiromdomang isinagibo an repatriation sa tahaw kan nagtitinding tensyon sa pagultangan kan Israel asin Iran.
Nagpuon an ribayan kan pambobomba kan Hunyo 13 makalihis akusaran kan Israel an Iran na harani nang maggibo nin nuclear weapon, bagay na pignigaran kan Tehran.
