LEGAZPI CITY-Piglalaoman ngunian na magtatarabangan an Department of Social Welfare and Development (DSWD) asin an Department of Human Settlements and Urban Development (DHSUD) ngani mapahalawig an housing support para sa mga pobre.
Sa pagtiripon kan duwang ahensya kan nakaaging aldaw, ipinaliwanag ni DHSUD Secretary Jose Ramon Aliling asin DSWD Secretary Rex Gatchalian na posibleng magkaigwa nin kolaborasyon an duwang departamento ngani matawanan nin housing support an nagkapirang pamilya na nakaistar sa tinampo asin magin para sa mga benepisyaryo kan Pantawid Pamilyang Pilipino Program (4P’s).
Nagpasalamat man si Aliling sa pagigin bukas kan DSWD sa pakikipag-olay sa mga pamilyang Pilipino na nangangaipo nin tabang kan gobyerno.
Mientrastanto, naghagad na nin listahan an DHSUD sa DSWD ngani maaraman kung sisay an mga benipisyaryo na nangangaipo nin housing support sa paagi nin transition shelter o dawa permanenteng harong.
Katuyuhan man kan kolaborasyon na i-align an mga programa sa pabahay kan DHSUD sa komprehensibong datos kan DSWD mapadapit sa mga indigent households para masierto na an housing assistance nakakaabot sa mga vulnerable sectors.
