LEGAZPI CITY-Ipighayag ni DSWD Secretary Rex Gatchalian na nadeterminaran kan mga social workers na igwa nin discernment o lubos na pagkasabot an 15-anyos na suspechado sa Tacloban City School shooting na ikinagadan nin tilong estudyante.
Isusumiter suboot sa korte an assessment, na iyo an madesisyon kun aakoon ini bilang ebidensya sa kaso.
Pighahalat man kan DSWD an resulta kan psychological assessment kan 15-anyos asin 14-anyos na mga suspechado ngani na makabilog nin magkakanigong intervention program.
Dati nang nagsangat nin kasong kriminal an mga awtoridad kontra sa 15-anyos na suspechado, mantang exempted na sa criminal liability an 14-anyos sa irarom kan Juvenile Justice and Welfare Act.
Parehong nagtetenir ngonian sa Regional Rehabilitation Center for Youth an nabanggit na mga suspechado.
Kasabay kaini, sinabi ni Gatchalian na preparado an ahensya na magpartisipar sa diskusyon mapadapit sa proposal na ibaba an edad kan criminal liability.
Importante suboot na siyasaton kun kaipuhan na amyendahan an ley o kun an problema yaon sa implementasyon kaini, orog na sa hampang kan mga bagong agyat arog kan internet, bullying, asin iba pang risk factors.
