LEGAZPI CITY-Nangangaipo ngonian nin tabang pinansyal para sa pang-urualdaw na gastuson an mga bakwit sa Brgy. Anoling sa Camalig, Albay susog sa mga opisyales digdi.
Ini makalihis an haros anom na bulan na pagtetenir sa mga evacuation centers mantang nagbalik na an mga displaced learners sa eskwela.
Segun kay Kap Mia Alemania, sa intrevista kan Bombo Radyo Legazpi na pighahagad kan mga evacuees an asistensyang pang pinansyal huli ta kaipuhan kan saindang mga aki nin balon asin pamasahe.
Kun kaya laoman ninda na magkaigwa nin cash assistance para sa sainda.
Nasa 124 na pamilya asin 425 na indibidwal an nasa evacuation center sa barangay asin mahigot man liwat na pinagbabawal na makabalik sinda sa saindang mga harong.
Padagos man suboot an pagtatao kan DSWD nin foodpacks asin nakakapagtao man nin tabang an nagkapirang mga non-government organizations partikular na sa psycho-social activity kan mga jovenes.
Natawanan man nin school supplies an mga displaced learners sa sainda.
Sa presente, padagos man an pag-aadal kan mga ini sa saindang mga eskwelahan.
